Turistveg Hardanger: Rasteplass Lussand

Lussand ligg vakkert til i eit landskapsvernområde knytta til edeltrelauvskog og er omgitt av fjell og fjord. Tidlegare framstod stoppunktet på Lussand som ei rein asfaltflate i tilknyting til vegen.

Som eit ledd i oppgraderinga av strekninga, vart det beslutta å heva kvaliteten på rasteplassen til eit nivå som er representativt for Nasjonale turistvegar. Målet var å gjera Lussand til eit trygt stoppunkt for informasjon og fotografering. Anlegget er underordna omgivnadane samstundes som det har fått sin eigen identitet. Det har fått ei reinskåren, enkel form, og det er nytta tradisjonelle, stad-eigne materiale i kombinasjon med benkar, avfallsbehaldarar og rekkverk med eit meir urbant uttrykk.